Die uitbreek van die Covid-19-pandemie het egter vanjaar ’n stuiwer in die armbeurs gegooi en jagters kon nie gaan jag nie. Dit het HelpJag genoop om saam met sy drie ambassadeurs asook Wild & Jag/Game & Hunt die #RandPerKilogram-inisiatief van stapel te stuur. Ter ondersteuning van die inisiatief is Wild & Jag/Game & Hunt bereid om ‘n ‘n 6maande gratis subskripsie op hulle digitale tydskrif te gee vir elke R120 wat geskenk word.

Weens die reëls en regulasies tydens die staat van inperking is daar baie onduidelikheid en onsekerheid oor wanneer die publiek weer kan gaan jag.

Die doel van die R35-skenkings is drievoudig.  Dit voed behoeftige kleuters en hul gesinne. Dit gee die wildplase of reservate ook ’n geleentheid om ’n inkomste te verdien tydens dié moeilike tye en verder dra die fondse by tot die algemene bestuur, betaling van werkers en ander belangrike bedrywighede soos teenstropery-aksies.

Wildsplase en reservate is nie net sakeondernemings wat tans swaar gebuk gaan of bloot ’n plek is waar daar op ’n verantwoordelike manier gejag word nie. Baie van die grond huisves ander belangrike dierspesies. Die meerderheid van beskikbare wild-habitat in Suid-Afrika is in privaat besit. Dus lê ’n groot deel van die potensiaal om te bewaar in dié areas. Deur wildplase te ondersteun help ons dus om die habitat van baie bedreigde spesies te bewaar.