Wie is betrokke?

Op daardie noot is bekende oud-springbok kaptein Bakkies Botha die trotse ambassadeur van #HelpJag.  Bakkies is reeds jare betrokke by die wildbedryf en verstaan die gesondheidsvoordele wat wildsvleis inhou.

“Ek is besorg oor die groeiende druk op huisgesinne. As gevolg van swaar ekonomiese tye is dit vir baie ouers onmoontlik om in hulle kinders se daaglikse behoeftes te voorsien. Ek moedig jagters aan om op julle volgende jagvakansie ’n ekstra bok te jag en te skenk vir hierdie waardige projek.

Nie net help dit om kinders te voed nie, maar dit bevestig weereens jagters se toewyding aan die jeug! Ons vier mos vanjaar Jag en Jeug.”

Nog ’n bekende wat sy stem aan die projek leen, is sanger, Adam Tas. Vir Adam is dit belangrik om deur vrygewigheid te help om die wêreld ’n beter plek te maak.

“Om iets te kan teruggee is tog wat die lewe sin gee, en wat beter sin kan die lewe hê as om ń glimlag op ń kind se gesig te kan sit.”